Жыл сайын 20 қараша күні барша әлем Дүниежүзілік балалар күнін атап өтеді. Аталмыш мереке орай, бүгін, 20 қараша күні Педиатрия және балалар хирургиясы ғылыми орталығының барлық бөлімінде мерекелік шаралар өтті.

Мерекелік шараны ашқан республикалық Балалар онкологиясы және гематология орталығының жетекшісі Гүлнар Әбділова ауруханада ем алып жатқан барша балаларды мерекемен құттықтап, тезірек құлан-таза айығып шығуларын тіледі.

Мерекелік шарада Алматы қаласының №70 мектеп еріктілері мен «Праздник подарков», «Море шоу» агенттігінің аниматорлары бүлдіршіндердің көңілін көтеріп, ән айтып, балалармен бірге би билеп, түрлі ойындар ойнады. Сиқыршы-Парвиз Рашитов өнерімен кішкентай пациенттерді қуантты. Балалар сиқыршымен бірге түрлі фокустар жасап, шат-шадымен күйге бөленді. Ертеңгіліктің ажарын ән-шашуымен келген ұстаздар: Айжан Ақышева мен Әл-Фараби Айтхан ашып, бүлдіршіндермен қатар, ата-аналардың да көңілін көтерді.

Шара барысында «Балалардың сурет және қолөнер көрмесі» жәрмеңкесі өтті. Орталықтың қызметкерлері балалардың қолынан шыққан заттарды сатып алып, аурухана ойын бөлмелерінің жабдықталуына өз үлестерін қосты. Ұйымдастырушылардың айтуынша, жәрмеңкеден түскен қаражатқа сонымен қатар, аппликация, сурет дәптері, бояу, қарындаш сияқты кеңсе тауарлары сатып алынбақ.

Мерекеде балалар арнайы қойылған банерлерде түрлі мөлтек фильм кейіпкерлерімен бірге фотосессиялар жасады.

Мерекелік шара соңында «Help Today» қоғамдық қоры мен Багдашикиналар отбасы барша балаға сыйлықтар таратып, науқас балалардың жүздеріне қуаныш сыйлады. Сыйлықтар тек әр балаға емес, орталық бөлімдеріндегі барлық ойын бөлмелеріне де таратылды.

Педиатрия орталығында ем алып жатқан барлық балаға зор денсаулық, мол бақыт, бақытты балалық шақ, қуаныш пен шаттыққа толы жарқын өмір тілейміз! Балалар мерекесі құтты болсын!

Мерекелік шара орталықтың барша тәрбиешілері мен психолог мамандарының ұйымдастыруымен өткізілді. Олар науқас балаларға ғана емес, олардың ата-аналарына да күнделікті психологиялық қолдау көрсетіп келеді.

#Балаларкүні!

#Педиатрияорталығы

#Баласаулығы