​Бүгін, 6 мамыр күні Педиатрия және балалар хирургиясы ғылыми орталығында Отан қорғаушылар күні мерекесіне арналған салтанатты жиын өтті.

Жиынды Педиатрия және балалар хирургиясы ғылыми орталығының Басқарма төрағасы Абай Құсайынов пен Басқарма төрағасының ғылыми-инновациялық қызмет жөніндегі орынбасары Лязат Манжуова ашып, барша ер-азаматтарды мерекемен құттықтады.

«Құрметті біздің ер-азаматтар, баршаңызды ерліктің мерекесі Отан қорғаушылар күнімен құттықтаймыз! Сіздердің балалар денсаулығын нығайтуға қосып жатқан үлестеріңіз үшін зор алғысымызды білдіреміз. Балалар саулығы жолындағы еңбектеріңіз жемісті болсын! Дендеріңізге саулық, отбасыларыңызға бақыт тілеймін! Ең бастысы, аспанымыз ашық, еліміз аман, жұртымыз тыныш болсын! «Қой үстінде бозторғай жұмыртқалаған» заман болсын!», деп атап өтті А.Құсайынов.

Мерекелік шарада бірқатар ер-жігіттер Құрмет грамоталарымен марапатталды. Атап айтқанда Ербол Өтегенов, Ерлан Жамаров, Ерлан Ахметжан, Кирилл Сущих, Кәмілхан Айтбаев денсаулық сақтау саласы мен орталық қызметіне сіңірген зор еңбегі және қоғамдық жұмыстардағы белсенділігі үшін Құрмет грамоталарымен марапатталды.

Сонымен қатар, орталықтың нәзікжандылары дауыс беру арқылы «Үздік» деп танылған дәрігерлер ер-азаматтарды түрлі аталымдар бойынша марапаттады. «Жүзден жүйрік, мыңнан тұлпар» шыққан аталым жеңімпаздары: Шоқан Тұрысбеков, Азамат Кубиев, Данияр Құсайынов, Еркебұлан Аралбеков, Абылай Арыстаналиевті марапаттарымен құттықтаймыз!

Шара шағын концерттік бағдарламамен аяқталды. Салтанатты шара соңында барша ер-азаматтарға мерекелік сыйлықтар таратылды.